13 кастрычніка, у дзень, калі 101 год таму адбылося апошняе аб’яўленне Панны Марыі тром пастушкам з партугальскай вёсачкі Фаціма, у шумілінскі Санктуарый Маці Божай з Фацімы прыехалі пілігрымы з розных гарадоў Беларусі. З Брэста і Віцебска, з Новалукомля і Наваполацка, са Смаргоні. Ва ўрачыстасці таксама прынялі ўдзел грэка-католікі Віцебскай царквы Уваскрасення Хрыстовага і хор “Гасанна” з касцёла Святой Барбары ў Віцебску.
Святую Імшу ўзначаліў а. Браніслаў Дашкевіч OP з Віцебскай парафіі Святой Барбары, разам з мясцовым пробашчам а. Анджэем Юхневічам OMI Літургію канцэлебравалі а. Зміцер Грышан, пробашч віцебскай грэка-каталіцкай царквы, кс. Мікалай Ліпскі з Новалукомля і а. Павел Лемех OMI з польскага кляштара.
Пра значнасць Ружанцовай малітвы ва ўсім свеце распавёў а. Павел у сваім казанні.
На прыканцы святой Імшы адбылася працэсія вакол касцёла, падчас якой вернікі ішлі з узнесенымі рукамі з ружанцам і запаленай свечкай і праслаўлялі Ружанцовай малітвай Найсвяцейшую Панну Марыю.
Потым ветлівыя гаспадары ўрачыстасці пачаставалі ўсіх прысутных гарбатай і смачнай кашай, прыгатаванымі ў салдацкай паходнай кухні, а таксама і іншымі ласункамі.
Аўтар матэрыялу:
Анатоль Бандарчук-Вошлаў, тэкст і фота
http://catholicnews.by/shumilina-ruzhancovae-nabazhjenstva-101-ugodki-aposhnjaga-facimskaga-ab-ja-lennja/